વર્તમાન કારોબારી સેશનમાં આઈટી ક્ષેત્રમાં ચાલતી વોલેટિલિટી વચ્ચે ટીસીએસ તરફથી પગારવધારા અંગેનું મહત્વનું અપડેટ સામે આવ્યું છે. કર્મચારી ધોવાણ બાદ કંપનીએ ફરી નિયમિત પગારવધારાનું સાયકલ શરૂ કર્યું છે, જે સંસ્થાકીય સ્થિરતાનો સંકેત આપે છે.
કંપનીના જણાવ્યા મુજબ તમામ ગ્રેડના કર્મચારીઓને પગારવધારો આપવામાં આવ્યો છે અને ટોપ પરફોર્મર્સને ડબલ ડિજિટ વધારો મળ્યો છે. આ નિર્ણય કર્મચારીઓના ઉત્સાહ અને પ્રતિબદ્ધતાને વધારવા માટે લેવામાં આવ્યો છે.
કંપની વિશે :
ટીસીએસએ વિતેલા નાણાકીય વર્ષના અંતે કુલ ૫,૮૪,૫૧૯ કર્મચારી હોવાનું જણાવ્યું છે, જ્યારે ગયા વર્ષની સરખામણીમાં અંદાજે ૨૩,૪૬૦નો ઘટાડો નોંધાયો છે. આ સમયગાળા દરમિયાન કંપનીના વર્કફોર્સમાં લગભગ ૨% ઘટાડો થયો છે. સાથે જ કંપનીએ ૨૫,૦૦૦ નવા ફ્રેશર્સને ઑફર લેટર આપ્યા છે અને મેનેજમેન્ટે જણાવ્યું છે કે માંગ વધે તો આગામી ત્રિમાસિકમાં વધુ ભરતી થઈ શકે છે.
કંપનીએ જણાવ્યું છે કે હવે પગારવધારો એપ્રીલ-આધારિત નિયમિત ઈન્ક્રીમેન્ટ સાયકલ મુજબ આપવામાં આવશે. વિલંબિત વધારો બાદ આ પગલું કામદારો માટે સ્થિરતા લાવશે એવી બજારની ધારણા છે.
બજારના મુખ્ય પરિબળો :
આઈટી સેક્ટરમાં વોલેટિલિટી યથાવત છે, જેમાં વૈશ્વિક માંગ, ડીલ ફ્લો અને ભરતીની નીતિઓ મહત્વપૂર્ણ નીવડી રહી છે. ટીસીએસના કર્મચારી ઘટાડા છતાં સ્કિલ ડેવલપમેન્ટ અને ટેક્નોલોજીકલ અપગ્રેડ પર ભાર યથાવત રહ્યો છે. કંપનીએ જણાવ્યું છે કે તેના ૨,૭૦,૦૦૦થી વધુ એસોસિયેટ્સ પાસે એઆઈ અને મશીન લર્નિંગ ક્ષેત્રમાં અગ્રણી કૌશલ્ય છે.
નાણાકીય પરિણામો :
ચોથા ત્રિમાસિકમાં ટીસીએસનો આવક ૯.૬% ઉછળીને ₹૭૦,૬૯૮ કરોડ સુધી પહોંચી છે, જ્યારે નફો ૧૨% વધારો સાથે ₹૧૩,૭૧૮ કરોડ નોંધાયો છે. આ પરિણામો બજારની અપેક્ષા કરતાં મજબૂત રહ્યા છે. કંપનીના માજિન સ્થિર રહ્યા છે અને મેનેજમેન્ટ તરફથી આગળના વર્ષ માટે સાવચેત આશાવાદી દૃષ્ટિકોણ રજૂ કરવામાં આવ્યો છે.
ભાવિ દિશા :
આગામી દિવસોમાં આઈટી સેક્ટર રેન્જ બાઉન્ડ વલણ સાથે આગળ વધી શકે છે. વૈશ્વિક પ્રોજેક્ટ્સ અને ડિજિટલ ટ્રાન્સફોર્મેશનની માંગ વધવા લાગ્યાનું સંકેત મળી રહ્યું છે. ટીસીએસ દ્વારા શરૂ કરાયેલ નિયમિત પગારવધારો સેક્ટર માટે સ્પર્ધાત્મક પ્રતિભાના જતન તરફનું મજબૂત પગલું ગણાય છે.
