જેએએલ (જ્યપ્રકાશ એસોસિએટ્સ) ના ઇન્સોલ્વન્સી કેસમાં વેદાન્તા અને અદાણી ગ્રુપ વચ્ચે ચાલતા બિડિંગ વિવાદમાં મહત્વપૂર્ણ વિકાસ થયો છે. રિઝોલ્યુશન પ્રોફેશનલે ટ્રિબ્યુનલમાં રજૂઆત કરી છે કે ટોપ બિડર વિશેની માહિતી ક્યારેય જાહેર કરવામાં આવી જ નહોતી, તેથી વેદાન્તાનો દાવો અસ્થિર છે.
અહેવાલ અનુસાર, એનસીએલએટીની દિલ્હી બેન્ચમાં ચાલી રહેલી સુનાવણી દરમિયાન રિઝોલ્યુશન પ્રોફેશનલના વકીલ અભિષેક મનુ સિંઘવીએ સ્પષ્ટ કર્યું કે વેદાન્તાને હાઈએસ્ટ બિડર જાહેર કરવામાં આવ્યો હતો તેવો કોઈ પુરાવો નથી.
કંપની વિશે :
જેએએલએ ૨૦૨૪માં બેન્કરપ્સી માટે અરજી કરી હતી અને કંપની પર અંદાજે ₹૫૦,૦૦૦ કરોડથી વધુનું દેવું બાકી છે. કંપની પાસે નોઈડા, ગ્રેટર નોઈડા અને યમુના એક્સપ્રેસવે વિસ્તારમાં લગભગ ૪,૦૦૦ એકર જેટલી જમીન, હોટેલ્સ અને સિમેન્ટ પ્લાન્ટ જેવી સંપત્તિ છે.
વેદાન્તાએ આશરે ₹૧૭,૦૦૦ કરોડની બિડ આપી હોવાનું જણાવ્યું હતું, જ્યારે અદાણી ગ્રુપની બિડ ₹૧૪,૫૪૩ કરોડ સાથે વધારાના ₹૮૦૦ કરોડના કેપિટલ વચન બાદ કુલ ₹૧૫,૩૪૩ કરોડના સ્તરે છે. લેનદારો મુજબ ફક્ત એનપીવી નહીં, પરંતુ પ્રોજેક્ટની વાયેબિલિટી અને અમલીકરણ સમયગાળો પણ મહત્વનો છે.
બજારના મુખ્ય પરિબળો :
વર્તમાન કારોબારી સેશનમાં આ કેસ ફરી ચર્ચામાં આવતાં સંબંધિત શેરોમાં વોલેટિલિટી યથાવત છે. વેદાન્તા લિમિટેડ સહિત કેટલાક સ્ટોક્સમાં પસંદગીયુક્ત ઘટાડો નોંધાયો છે. કોર્ટના આગામી નિર્ણયની રાહ જોતા રોકાણકારોમાં સાવચેતીનો માહોલ છે.
કાનૂની પ્રક્રિયા લાંબી ખેંચાતી હોવાથી લેનદારોના અભિગમમાં પણ સ્પષ્ટતા મર્યાદિત છે, જેના કારણે આ ક્ષેત્રના શેરોમાં રેન્જ બાઉન્ડ મૂવમેન્ટ જોવા મળી રહ્યું છે.
ટેકનિકલ દૃષ્ટિકોણ :
ટેકનિકલ ચાર્ટ મુજબ વેદાન્તા લિમિટેડના શેરોમાં ઉપરની તરફ રેઝિસ્ટન્સ ઝોન યથાવત છે. મજબૂત ક્લોઝિંગ ન આવે ત્યાં સુધી બુલિશ બાયસ નબળો રહેશે. નીચેની તરફ મહત્વના સપોર્ટ લેવલ તૂટે તો વધુ ઘટાડાની શક્યતા નકારી શકાય નહીં.
અદાણી ગ્રુપના શેરોમાં પણ વધતી વોલેટિલિટી વચ્ચે રોકાણકારોએ સાવચેતીપૂર્વક ટ્રેડિંગ કરવી જરૂરી છે.
રોકાણ રણનીતિ :
ઉછાળે નફારૂપી વેચવાલી અને ઘટાડે તબક્કાવાર ખરીદીની વ્યૂહરચના હાલ યોગ્ય માનવામાં આવી રહી છે. કોર્ટના અંતિમ નિર્ણય સુધી પોઝિશનમાં સાવચેતી જાળવવી, તેમજ કડક સ્ટોપલોસ સાથે ટ્રેડ કરવું અનિવાર્ય છે.
કાનૂની નિર્ણય આગળ વધતા બજારમાં નવી દિશા બને તેવી શક્યતા છે.
ભાવિ દિશા :
આગામી દિવસોમાં એનસીએલએટીની સુનાવણી અને લેનદારોની સમિતિ (CoC) તરફથી આવનારા પ્રતિસાદને કારણે બજારમાં વધુ વોલેટિલિટી રહી શકે છે. લાર્જ કેપ શેરોમાં મર્યાદિત મૂવમેન્ટ સાથે ક્ષેત્ર વિશેષ સ્ટોક્સમાં પસંદગીયુક્ત ધોવાણ યથાવત રહેવાની સંભાવના છે.
