વર્તમાન કારોબારી સેશનમાં જ્વેલરી સેગમેન્ટમાં તીવ્ર ઘટાડો નોંધાયો છે. પ્રધાનમંત્રી નરેન્દ્ર મોદીના ગોલ્ડની અનાવશ્યક ખરીદી એક વર્ષ માટે ટાળવા અપીલ બાદ સેગમેન્ટમાં નફારૂપી વેચવાલી વધી છે અને અનેક શેરોમાં પસંદગીયુક્ત ધોવાણ જોવા મળ્યું છે.
બજારના મુખ્ય પરિબળો :
પીએમના આ સંદેશ પછી રોકાણકારોમાં માંગના અનુમાન પર સાવચેતીનો માહોલ જોવા મળી રહ્યો છે. સેનકો ગોલ્ડમાં આશરે ૮.૬૯% ઘટાડો, ટાઈટનમાં ૬.૪૫% ઘટાડો અને કલ્યાણ જ્વેલર્સમાં ૮.૩% ધોવાણ નોંધાયું છે. પીસી જ્વેલર જેવી કંપનીમાં પણ મર્યાદિત ઘટાડો રહ્યો છે.
વૈશ્વિક સ્તરે જિઓપોલિટિકલ તણાવ, ઊંચા ઓઈલ ભાવ અને ફોરેન એક્સચેન્જની અનિશ્ચિતતાને કારણે શેરબજારમાં વોલેટિલિટી યથાવત રહી છે.
સેક્ટર દૃષ્ટિકોણ :
જ્વેલરી સેક્ટરમાં બેરિશ બાયસ સ્પષ્ટ દેખાઈ રહ્યો છે. ગોલ્ડની માંગમાં ઘટાડાની શક્યતા વચ્ચે રોકાણકારોએ ઉછાળે નફારૂપી વેચવાલી કરી છે. ગોલ્ડ આયાત ઓછી કરવા સરકારની અપીલ સેક્ટરમાં ટૂંકાગાળાની નકારાત્મકતા લાવી રહી છે, જ્યારે અન્ય કન્ઝ્યુમર સેગમેન્ટોમાં મર્યાદિત ખરીદી ચાલુ છે.
ટેકનિકલ દૃષ્ટિકોણ :
ટેકનિકલ ચાર્ટ મુજબ જ્વેલરી સેગમેન્ટના અનેક શેરોમાં સપોર્ટ લેવલ તૂટ્યા છે, જે બ્રેકડાઉનનું સંકેત આપે છે. સેનકો ગોલ્ડ અને કલ્યાણ જ્વેલર્સ બંનેમાં રેઝિસ્ટન્સ પરથી નફારૂપી વેચવાલી યથાવત છે. ટાઈટન માટે મજબૂત ક્લોઝિંગ આવશ્યક બની રહ્યું છે, નહીં તો આગળના દિવસોમાં વધુ ઘટાડો શક્ય છે.
રોકાણ રણનીતિ :
ટૂંકાગાળાના ટ્રેડર્સે કડક સ્ટોપલોસ સાથે જ પોઝિશન રાખવી. ઉછાળે નફારૂપી વેચવાલી ચાલુ રહેતી હોવાથી સાવચેતી જરૂરી છે. ઘટાડે તબક્કાવાર ખરીદી માત્ર ક્વોલિટી શેરોમાં જ યોગ્ય રહેશે.
ભાવિ દિશા :
આગામી સેશન્સમાં જ્વેલરી સેક્ટર રેન્જ બાઉન્ડથી નેગેટિવ વલણ યથાવત રાખી શકે છે. ગોલ્ડ આયાત સંબંધિત સરકારના પગલાં અને વૈશ્વિક પરિસ્થિતિઓ સેક્ટરની દિશા નક્કી કરશે.
