વર્તમાન કારોબારી સેશનમાં બજારમાં શરૂઆત ગેપ-અપ સાથે થઈ હતી, પરંતુ આરબીઆઈની સાવચેતીભરી નીતિને કારણે વોલેટિલિટી વધતી ગઈ અને દિવસના અંતે ઇન્ડેક્સમાં ઘટાડો નોંધાયો. રૂપિયા આજે સૌથી વધુ ધ્યાન ખેંચનાર રહ્યો કારણ કે તેમાં આશરે ૮૫ પૈસાનો ઉછાળો જોવા મળ્યો તથા ૮૪.૯૪ ના સ્તરે મજબૂત ક્લોઝિંગ નોંધાયું.
બજારના મુખ્ય પરિબળો :
આરબીઆઈની મોનેટરી પોલિસી કમિટીએ રેપો રેટ ૬.૫ ટકા પર યથાવત રાખવાનો નિર્ણય કર્યો, જે બજારની અપેક્ષા મુજબ હતો. પરંતુ વૃદ્ધિનો અંદાજ ઘટાડતા અને મોંઘવારીનો અંદાજ વધારવાથી સાવચેતીનો માહોલ સર્જાયો. વૈશ્વિક સ્તરે ક્રૂડના ઘટાડા અને ડોલરની નબળાઈને પગલે રૂપિયાને મજબૂત સપોર્ટ મળ્યો. દિવસ દરમિયાન પ્રોફિટ બુકિંગ વધતા બજાર ઈન્ડેક્સમાં ઘટાડો નોંધાયો.
સેક્ટર દૃષ્ટિકોણ :
મીડિયા, રિયલ્ટી, હેલ્થકેર અને એફએમસિજિ સેગમેન્ટમાં મર્યાદિત ખરીદી જોવા મળી જ્યારે મેટલ્સ, આઈટી અને ઓઈલ એન્ડ ગેસ સેક્ટરમાં દબાણ યથાવત રહ્યું. મિડકેપ અને સ્મોલકેપ શેરોમાં પસંદગીયુક્ત ધોવાણને કારણે બજારનું બ્રેડ્થ નબળું રહ્યું.
ટેકનિકલ દૃષ્ટિકોણ :
ટેકનિકલ ચાર્ટ મુજબ નિફ્ટી માટે ૨૩,૧૦૦ થી ૨૩,૧૫૦ નો ઝોન મહત્વનો સપોર્ટ લેવલ માનવામાં આવે છે, જ્યારે રેઝિસ્ટન્સ ૨૩,૫૫૦ થી ૨૩,૮૦૦ નજીક રહેશે. ઉછાળે નફારૂપી વેચવાલી યથાવત જોવા મળી રહી છે, જ્યારે ઘટાડે તબક્કાવાર ખરીદી કરનાર રોકાણકારો સક્રિય રહ્યા. જો સપોર્ટ લેવલ તૂટી જાય તો બેરિશ બાયસ વધવાની શક્યતા છે.
રોકાણ રણનીતિ :
ટૂંકા ગાળાના ટ્રેડર્સ માટે કડક સ્ટોપલોસ અનિવાર્ય છે. હાઈ-બીટા સેક્ટર્સમાં સાવચેતી રાખવી અને ફક્ત ક્વોલિટી શેરોમાં જ પોઝિશન જાળવવી. હાલમાં બજાર રેન્જ બાઉન્ડ હોવાથી ઉછાળે નફારૂપી વેચવાલી અને ઘટાડે તબક્કાવાર ખરીદીની રણનીતિ વધુ અસરકારક રહેશે.
ભાવિ દિશા :
આગામી દિવસોમાં બજાર યુએસનાં મેક્રો આર્થિક ડેટા, મોંઘવારી સંબંધિત વૈશ્વિક અપડેટ્સ, મોન્સૂન પ્રગતિ અને એફઆઈઆઈના ફંડ ફ્લો પર નિર્ભર રહેશે. નિફ્ટી જો સપોર્ટ લેવલ ઉપર ટકશે તો મર્યાદિત ઉછાળો મળી શકે છે, પરંતુ ૨૩,૨૦૦ નીચે બ્રેકડાઉન થાય તો વધુ ઘટાડાની સંભાવના રહે છે.
