વર્તમાન કારોબારી સેશનમાં ડેલ ટેકનોલોજીના શેરોમાં નોંધાયેલા તીવ્ર ઉછાળાએ વૈશ્વિક ટેક સેક્ટરમાં નવી ચર્ચાઓ જગાવી છે. AI સર્વર ડિમાન્ડમાં સતત વધારા સાથે કંપનીએ આવકનો મજબૂત અંદાજ જાહેર કર્યો છે, જેના કારણે રોકાણકારોમાં સાવચેતીનો માહોલ હોવા છતાં પસંદગીયુક્ત ખરીદી યથાવત રહી છે.
કંપની વિશે :
ડેલે AI વર્કલોડ્સ માટે બનાવાયેલા સર્વર્સની વધતી માંગનો લાભ લીધો છે. કોર્વીવ અને એનસ્કેલ જેવી ક્લાઉડ કમ્પ્યુટિંગ કંપનીઓ ઉપરાંત મોટા AI પ્રોવાઇડર્સ તરફથી પણ ઓર્ડર્સ મળ્યા છે. તાજેતરના ક્વાર્ટરમાં કંપનીએ આશરે ૨૪.૪ બિલિયન ડોલરના AI ઓર્ડર્સ બુક કર્યા જ્યારે AI સર્વર સેલ્સ ૧૬.૧ બિલિયન ડોલર સુધી પહોંચી હતી.
શેરમાં ૩૩ ટકાનો ઉછાળો આવીને ૪૨૦.૯૧ ડોલરે ક્લોઝિંગ નોંધાયું, જે ૨૦૧૮ પછીનો સૌથી મજબૂત એક દિવસનો ઉછાળો છે.
નાણાકીય પરિણામો :
કંપનીની પ્રથમ ક્વાર્ટર સેલ્સ ૮૮ ટકાના ઉછાળાને પાર કરી ૪૩.૮ બિલિયન ડોલરે પહોંચી, જ્યારે બજારનો અંદાજ આશરે ૩૫.૫ બિલિયન ડોલર હતો. પરંપરાગત CPU આધારિત સર્વર બિઝનેસમાં પણ મજબૂત વૃદ્ધિ નોંધાઈ અને આવક બમણી થઈ ૮.૫ બિલિયન ડોલર સુધી પહોંચી.
પ્રોફિટ (excluding items) ૪.૮૬ ડોલર પ્રતિ શેર રહ્યો, જ્યારે અંદાજ ૨.૯૯ ડોલર હતો. યુએસ મિલિટરી તરફથી માઈક્રોસોફ્ટ સોફ્ટવેર લાઇસન્સ મેનેજમેન્ટ માટે ૯.૭ બિલિયન ડોલરનો કરાર મળવો કંપની માટે વધુ મજબૂત સપોર્ટ તરીકે ગણાય છે.
બજારના મુખ્ય પરિબળો :
AI સર્વર્સની વધતી માંગ યથાવત રહી છે. ઓર્ડરબુક ૫૧.૩ બિલિયન ડોલર સુધી પહોંચી છે, જે નજીકના ગાળામાં કંપની માટે બુલિશ બાયસ જાળવે છે. મેમરી ચિપ્સના ભાવમાં થયેલા વધારા વચ્ચે ડેલે ખર્ચ નિયંત્રણ જાળવી રાખવાનો પ્રયાસ કર્યો છે, જે નફાકારકતાને મજબૂત બનાવે છે.
ટેકનિકલ દૃષ્ટિકોણ :
ટેકનિકલ ચાર્ટ મુજબ તાજેતરના બ્રેકઆઉટ બાદ મજબૂત ક્લોઝિંગે બુલિશ બાયસ જાળવી છે. આગામી દિવસોમાં જો રેઝિસ્ટન્સ ઉપર ક્લોઝિંગ યથાવત રહે તો વધુ ઉછાળાની શક્યતા રહેશે, જ્યારે ઘટાડે તબક્કાવાર ખરીદી રોકાણકારો માટે યોગ્ય ગણાય છે.
ભાવિ દિશા :
આગામી સેશન્સમાં ટેક સેક્ટર સંબંધિત શેરોમાં મર્યાદિત ખરીદી જોવા મળી શકે છે. AI સેગમેન્ટના પ્રદર્શનને ધ્યાનમાં લેતા ડેલમાં પસંદગીયુક્ત પોઝિશન જાળવી રાખવા વિશ્લેષકો સલાહ આપી રહ્યા છે, જોકે ઉછાળે નફારૂપી વેચવાલી કરવી યોગ્ય ગણાય છે.
