વર્તમાન કારોબારી સેશનમાં ભારતીય બજારમાં મિશ્ર વલણ જોવા મળી રહ્યું છે. વૈશ્વિક સંકેતો સકારાત્મક હોવા છતાં ઊંચા ક્રૂડ પ્રાઈસ, નબળી રૂપિયા અને તાજેતરના ઈંધણ ભાવ વધારાને કારણે બજારમાં સાવચેતીનો માહોલ યથાવત રહ્યો છે.
સેન્સેક્સ ૭૫,૫૫૦ આસપાસ અને નિફ્ટી ૨૩,૭૪૦ નજીક રેન્જ બાઉન્ડ ટ્રેડ થઈ રહ્યા છે. સેશનની શરૂઆત ગેપ-અપ સાથે થઈ હતી, પરંતુ બાદમાં વોલેટિલિટી વધતા દબાણ જોવા મળ્યું.
બજારના મુખ્ય પરિબળો :
ઊંચા ક્રૂડ ઓઈલ ભાવ અને સરકારે જાહેર કરેલા પેટ્રોલ-ડીઝલમાં ₹૩ પ્રતિ લિટર અને CNGમાં ₹૨ પ્રતિ કિગ્રા વધારો બજારના મિજાજ પર અસરકારક રહ્યો છે. રૂપિયા ૯૫.૯૪ સ્તર સુધી નબળો પડતાં આયાત આધારિત સેક્ટરોમાં દબાણ જોવા મળ્યું.
વૈશ્વિક બજારથી મળેલા સકારાત્મક સંકેતો, ખાસ કરીને વોલ સ્ટ્રીટના રેકોર્ડ ક્લોઝિંગ અને જીઓપોલિટિકલ સંપર્કો, બજારને મર્યાદિત સપોર્ટ આપી રહ્યા છે.
સેક્ટર દૃષ્ટિકોણ :
આઈટી સેક્ટરમાં આજે મજબૂત ઉછાળો જોવા મળ્યો છે. ઈન્ફોસિસ, ટેક મહિન્દ્રા, TCS અને HCLમાં ૨%થી વધુ ઉછાળો નોંધાયો છે. ગઈ કાલે IT ઇન્ડેક્સમાં ૧.૭૫% ઘટાડો આવ્યો હતો, ત્યારબાદ આજે તબક્કાવાર ખરીદી જોવા મળી છે.
મેટલ્સ સેક્ટરમાં પસંદગીયુક્ત ધોવાણ નોંધાયું છે, જેમાં હિન્દાલ્કો ૨.૫% જેટલું ગગડ્યું. ઓઈલ માર્કેટિંગ કંપનીઓમાં ઈંધણ ભાવ વધારાનો મર્યાદિત પ્રભાવ દેખાય છે, પરંતુ વધુ દબાણ નકારી શકાય નહીં.
ડિફેન્સ અને ઈલેક્ટ્રોનિક્સ શેરોમાં BELમાં નાનો ઘટાડો જોવા મળ્યો, જ્યારે રિલાયન્સ ઇન્ડસ્ટ્રીઝમાં નફારૂપી વેચવાલી નોંધાઈ.
કંપની વિશે :
Sigma Advanced Systemsને ઉત્તર અમેરિકા તરફથી ₹૧૦૭ કરોડનો નવો એક્સપોર્ટ ઓર્ડર મળ્યો છે, જે કંપની માટે મજબૂત પોઝિટિવ ગણાય છે.
Hester Biosciencesના Q4 પરિણામ મજબૂત રહ્યા છે. કંપનીનો નેટ પ્રોફિટ નોંધપાત્ર રીતે વધીને ₹૨૬.૪ કરોડ થયો છે અને શેરમાં ૧૨.૫% ઉછાળો જોવા મળ્યો છે.
Patel Engineering તેમજ TD Power Systemsના પરિણામો પણ સપોર્ટિવ રહ્યા છે, જ્યારે LT Foodsએ સ્થિર પ્રદર્શન કર્યું છે.
ટેકનિકલ દૃષ્ટિકોણ :
નિફ્ટી માટે ઉપરની તરફ ૨૪,૮૦૦ નજીક રેઝિસ્ટન્સ યથાવત છે. ટેકનિકલ ચાર્ટ મુજબ બજાર માટે ૨૩,૪૨૨ – ૨૩,૫૮૫ ઝોન મહત્વપૂર્ણ સપોર્ટ લેવલ માનવામાં આવી રહ્યો છે.
બેન્કિંગ ઇન્ડેક્સમાં બુલિશ બાયસ જોવા મળે છે, તો પણ મજબૂત ક્લોઝિંગ વગર બ્રેકઆઉટની શક્યતા મર્યાદિત રહેવાની છે.
રોકાણ રણનીતિ :
ઉછાળે નફારૂપી વેચવાલી કરવી અનુરૂપ રહેશે. ઘટાડે તબક્કાવાર ખરીદી ક્વોલિટી શેરોમાં રાખવી યોગ્ય ગણાય. વધતી વોલેટિલિટી વચ્ચે સ્ટોપલોસ સાથે ટ્રેડિંગ કરવું અનિવાર્ય છે.
ભાવિ દિશા :
આગામી સેશન્સમાં બજાર રેન્જ બાઉન્ડ રહેવાની શક્યતા છે. રૂપિયા, ક્રૂડ ઓઈલ અને વૈશ્વિક સૂચકાંકોના સંકેતો બજારની દિશા નક્કી કરશે.
