વર્તમાન કારોબારી સેશનમાં વેબસોલ એનર્જી સિસ્ટમના શેરમાં મજબૂત ઉછાળો નોંધાયો છે. જાણીતા રોકાણકાર વિજય કેડિયાએ Q૪ દરમિયાન કંપનીમાં ૧.૦૨% હિસ્સો ખરીદ્યો હતો, જેના કારણે રોકાણકારોમાં સકારાત્મક ભાવના સાથે શેરમાં તેજી જોવા મળી રહી છે.
કંપનીના શેર BSE પર રૂ. ૯૬.૮૫ સુધી પહોંચીને ૧૦% અપર સર્કિટમાં ટ્રેડ થયા હતા. છેલ્લા એક અઠવાડિયામાં શેરમાં નોંધપાત્ર ઉછાળો જોવા મળ્યો છે, જ્યારે લાંબા ગાળામાં સ્મોલકેપ સેગમેન્ટની વોલેટિલિટી વચ્ચે ઘટાડાનો દબાણ યથાવત રહ્યો છે.
બજારના મુખ્ય પરિબળો :
વિજય કેડિયાએ Q૪ દરમિયાન ૪૪.૪૪ લાખ શેરોમાં રોકાણ કરીને ૧.૦૨% હિસ્સેદાર તરીકે એન્ટ્રી કરી છે. તેમની એન્ટ્રી સ્મોલકેપ શેરોમાં ઉત્સાહ લાવે છે, કારણ કે તેઓ હાઈ ગ્રોથ બિઝનેસમાં વિશ્વાસ ધરાવતા રોકાણકારોમાં ગણાતા રહ્યા છે. શેરહોલ્ડિંગ પેટર્ન મુજબ, મ્યુચ્યુઅલ ફંડ અને બેંકોનો ૦.૩૨% હિસ્સો છે, જ્યારે વિદેશી રોકાણકારો (FPI)નું હિસ્સેદારી પ્રમાણ આશરે ૪.૧૨% છે.
શેરમાં છેલ્લા એક મહિનામાં આશરે ૨૬% સુધીનો મજબૂત ઉછાળો નોંધાયો છે. છતાં, ગયા એક વર્ષમાં શેરમાં ૩૫% સુધીનો ઘટાડો જોવા મળ્યો હતો, જે સ્મોલકેપ સેગમેન્ટની વોલેટિલિટી દર્શાવે છે.
કંપની વિશે :
વેબસોલ એનર્જી સિસ્ટમ ફોટોવોલ્ટેઇક ક્રિસ્ટલાઇન સોલાર સેલ અને મોડ્યુલના ઉત્પાદન સાથે જોડાયેલી કંપની છે. પશ્ચિમ બંગાળના ફાલ્ટા સ્થિત પ્લાન્ટમાંથી કંપની સ્થાનિક તથા આંતરરાષ્ટ્રીય બજારોને સેવા આપે છે. તેની પ્રોડક્ટ્સ કોમર્શિયલ અને ઇન્ડસ્ટ્રીયલ સેગમેન્ટ્સમાં ઉપયોગી સાબિત થઈ રહી છે.
કંપની હાલમાં અંદાજિત રૂ. ૩,૯૭૦ કરોડના માર્કેટ કેપ સાથે ટ્રેડ થઇ રહી છે. છેલ્લાં પાંચ વર્ષમાં શેરે ૨,૦૦૦% કરતા વધુ રિટર્ન આપ્યા છે, જે તેની લાંબા ગાળાની ક્વોલિટી અને મજબૂત રિટર્ન પોટેન્શિયલ દર્શાવે છે.
નાણાકીય પરિણામો :
કંપનીએ માહિતી આપી છે કે ૨૭ એપ્રિલના રોજ બોર્ડ મીટિંગ યોજાશે, જેમાં Q૪ ના નાણાકીય પરિણામો અને અંતિમ ડિવિડન્ડની ભલામણ અંગે ચર્ચા થશે. જો ડિવિડન્ડને મંજૂરી મળે, તો આશરે ૧૭ વર્ષ પછી કંપની પહેલીવાર ડિવિડન્ડ જાહેર કરશે.
ટેકનિકલ દૃષ્ટિકોણ :
ટેકનિકલ ચાર્ટ મુજબ શેર હાલ બુલિશ બાયસ સાથે ટ્રેડ થઈ રહ્યું છે. મજબૂત ક્લોઝિંગ શેરને આગામી દિવસોમાં રેઝિસ્ટન્સ લેવલ ઉપર બ્રેકઆઉટ તરફ લઈ જઈ શકે છે. જો નીચેની તરફ સપોર્ટ લેવલ યથાવત રહે, તો ઘટાડા પછી પસંદગીયુક્ત તબક્કાવાર ખરીદીનો અવસર મળી શકે છે.
રોકાણ રણનીતિ :
• ઉછાળે નફારૂપી વેચવાલી યોગ્ય રહેશે.
• ઘટાડે તબક્કાવાર ખરીદીનો અભિગમ જાળવવો જરૂરી.
• સ્મોલકેપ સેગમેન્ટની વોલેટિલિટી વચ્ચે સ્ટોપલોસ અનુસરવો અનિવાર્ય.
