સાઉદી આરામકોના CEO અમિન નસર દ્વારા ઈરાન સંકડામણને કારણે હ્યુસ્ટનમાં યોજાનારી સીરાવિક કોન્ફરન્સમાંથી પીછેહઠ કરાતા વૈશ્વિક ઊર્જા બજારમાં સાવચેતીનો માહોલ જોવા મળી રહ્યો છે. ગલ્ફ ક્ષેત્રમાં ઊર્જા ઈન્ફ્રાસ્ટ્રક્ચર પર થયેલા હુમલાઓ અને હોર્મુઝ જળમાર્ગમાં અવરોધને કારણે ક્રૂડ ઓઈલ માર્કેટમાં વોલેટિલિટી યથાવત રહ્યો છે.
ઉદ્યોગ સ્રોતોના જણાવ્યા મુજબ નસર માત્ર હાજરી જ રદ્દ કરી નથી પરંતુ કોન્ફરન્સ માટે કોઈ રેકોર્ડેડ સંદેશ મોકલવાનો પણ ઇનકાર કર્યો છે. આ નિર્ણય આરામકો સામે ઉભા થયેલા પડકારોને વધુ સ્પષ્ટ કરે છે અને રોકાણકારો માટે ચિંતાનો વિષય બની રહ્યો છે.
કંપની વિશે :
સાઉદી આરામકો વિશ્વની સૌથી મોટી ઓઈલ એક્સપોર્ટર કંપની છે અને CEO અમિન નસર છેલ્લા દસ વર્ષથી નેતૃત્વ કરી રહ્યા છે. COVID-૧૯ બાદનો આ સૌથી મોટો ભૂ-રાજકીય તણાવ ગણાય છે, કારણ કે ઈરાન તરફથી ગલ્ફ વિસ્તારમાં અનેક હુમલાઓ થયા છે જેમાં આરામકોની સ્થાપનાઓ પણ સામેલ છે. આ સ્થિતિએ વૈશ્વિક સપ્લાય ચેઇન પર અસર ઊભી કરી છે.
હોર્મુઝ જળમાર્ગ હાલ અંશતઃ અવરોધિત હોવાથી આરામકો પૂર્વ કિનારાથી પશ્ચિમ કિનારે ક્રૂડ ટ્રાન્સફર કરીને યાન્બુ પોર્ટ પરથી લોડિંગ કરી રહ્યું છે. જોકે તાજેતરમાં યાન્બુ નજીકની રિફાઈનરી પર થયેલા ડ્રોન હુમલાને કારણે તાત્કાલિક લોડિંગ અટકતા કિંમતોમાં ઉછાળો નોંધાયો છે. બ્રેન્ટ ક્રૂડની કિંમત ૮૮ ડોલર પ્રતિ બેરલ નજીક પહોંચી છે જ્યારે ડબલ્યુટીઆઈ ક્રૂડ પણ ૮૪ ડોલર સ્તર આસપાસ ટ્રેડ થઈ રહ્યું છે.
બજારના મુખ્ય પરિબળો :
• ગલ્ફ ક્ષેત્રમાં ઊર્જા સ્થાપનાઓ પર પસંદગીયુક્ત હુમલાઓ
• હોર્મુઝ અવરોધને કારણે વૈશ્વિક સપ્લાય ચેઇનમાં ધોવાણ
• અમેરિકન અને ઈરાન વચ્ચે વધતા તણાવથી વૈશ્વિક બજારમાં વોલેટિલિટી
• ક્રૂડ ઓઈલ કિંમતોમાં મર્યાદિત ઉછાળો અને સપ્લાય અંગે અનિશ્ચિતતા
સેક્ટર દૃષ્ટિકોણ :
ઊર્જા સેક્ટરમાં હાલ બેરિશ બાયસ જોવા મળી રહ્યો છે. ગલ્ફ દેશોમાં LNG તથા રિફાઈનરી સ્થાપનાઓ પર હુમલાઓને કારણે ઉત્પાદન ક્ષમતા પર અસર પડી છે. કતારની LNG ક્ષમતા અંદાજે ૧૭% સુધી અસરગ્રસ્ત રહેવાની શક્યતા છે. મધ્યપૂર્વના વધતા તણાવને કારણે એશિયન ઓઈલ આયાતકાર દેશોમાં પણ સાવચેતીનો માહોલ યથાવત રહ્યો છે.
ભાવિ દિશા :
આગામી દિવસોમાં વૈશ્વિક ઊર્જા બજાર રેન્જ બાઉન્ડ વલણ સાથે વોલેટિલિટી જાળવી શકે છે. જો અમેરિકન હસ્તક્ષેપ વધે કે ઈરાન તરફથી વધુ હુમલાઓ થાય તો ક્રૂડ પ્રાઈસમાં મજબૂત ઉછાળો જોવા મળી શકે છે. બીજી તરફ, હોર્મુઝ જળમાર્ગ ખુલવાની શક્યતા તેજ થાય તો કિંમતોમાં ઘટાડો શક્ય છે. રોકાણકારોએ હાલમાં ઊર્જા સંબંધિત એસેટ્સમાં સાવચેતી જાળવી અને તબક્કાવાર ખરીદીની રણનીતિ અપનાવવી યોગ્ય રહેશે.
