વર્તમાન કારોબારી સેશનમાં અમેરિકન શેરબજારમાં ફલેટ થીમ યથાવત રહ્યો છે. ત્રણ દિવસના સતત ઉછાળા બાદ રોકાણકારોએ સાવચેત વલણ અપનાવ્યું છે કારણ કે ધ્યાન હવે ફેડરલ રિઝર્વની આ અઠવાડિયાની મહત્વપૂર્ણ બેઠક તરફ છે.
ડાઉ જોન્સ ફ્યુચર્સમાં ૦.૧૧ ટકાનો મર્યાદિત ઉછાળો જોવા મળ્યો, નાસ્ડેક ૧૦૦ ફ્યુચર્સમાં ૦.૨૮ ટકાનો વધારો નોંધાયો જ્યારે એસ એન્ડ પી ૫૦૦ ફ્યુચર્સ લગભગ સ્થિર રહ્યા. ટેક અને એઆઈ સેગમેન્ટમાં બુલિશ બાયસ યથાવત છે.
બજારના મુખ્ય પરિબળો :
મિડલ ઈસ્ટ વિસ્તારમાં તણાવમાં ઘટાડા અને અમેરિકા–ઈરાન વચ્ચે થયેલા તાત્કાલિક સમાધાનને કારણે ક્રૂડ ઓઈલના ભાવોમાં ઘટાડો નોંધાયો છે. બ્રેન્ટ ક્રૂડ આશરે ૮૧ ડોલર નજીક ટ્રેડ થઈ રહ્યું છે, જેના કારણે વૈશ્વિક વોલેટિલિટી થોડી શાંત થઈ છે. સ્ટ્રેઈટ ઓફ હોર્મુઝ વિસ્તારમાં સ્થિરતા આવતા એનર્જી કોસ્ટમાં દબાણ સર્જાયું છે, જે ફેડ માટે મર્યાદિત રાહતરૂપ ગણાય છે.
ફેડ અધ્યક્ષ કેવિન વાર્શની પ્રથમ બેઠક હોવાથી બજારમાં વધારાની સાવચેતી જોવા મળી રહી છે. વ્યાજદર હાલ યથાવત રહેવાની શક્યતા મજબૂત છે, પરંતુ ફેડના આગળના વલણ પર માર્કેટનું ધ્યાન કેન્દ્રિત છે.
સેક્ટર દૃષ્ટિકોણ :
ટેક અને એઆઈ સંબંધિત શેરોમાં મજબૂત બુલિશ બાયસ જોવા મળી રહ્યો છે જ્યારે એનર્જી અને ફાઈનાન્સ સેગમેન્ટમાં પસંદગીયુક્ત ધોવાણ નોંધાય છે. ક્રૂડના ઘટાડા બાદ બજારમાં મર્યાદિત સ્થિરતા જોવા મળી રહી છે.
કંપની વિશે : સ્પેસએક્સ
સ્પેસએક્સના શેરોમાં પ્રી-માર્કેટ સેશનમાં ૧૦ ટકાનો ઉછાળો નોંધાયો છે. લિસ્ટિંગ બાદ સતત ત્રીજા દિવસે તેજીના માહોલે કંપનીની પોઝિશન મજબૂત બનાવી છે. કંપનીના મૂલ્યાંકનમાં ઝડપી વધારાથી તે અમેઝોનને પાછળ મૂકીને વિશ્વની ટોચની પાંચ કંપનીઓમાં સ્થાન મેળવવાના માર્ગે છે.
લિસ્ટિંગ પછી સ્પેસએક્સમાં અત્યાર સુધીમાં ૫૦ ટકાથી વધારે ઉછાળો નોંધાયો છે, જે હાલના બજારમાં સૌથી મજબૂત પરફોર્મન્સ ધરાવતી કંપનીઓમાંની એક ગણાય છે.
ટેકનિકલ દૃષ્ટિકોણ :
અમેરિકન સૂચકો હાલ રેન્જ બાઉન્ડ ચાલ દર્શાવી રહ્યા છે. ફ્યુચર્સ ચાર્ટ મુજબ ફેડ નિવેદન પહેલાં મોટો બ્રેકઆઉટ અથવા બ્રેકડાઉન થવાની શક્યતા મર્યાદિત છે. મધ્યમ સપોર્ટ ઝોન પર તબક્કાવાર ખરીદી અને ઉપરની તરફ રેઝિસ્ટન્સ નજીક નફારૂપી વેચવાલી યથાવત દેખાઈ રહી છે.
ભાવિ દિશા :
આગામી દિવસોમાં ફેડની ટિપ્પણીઓ, એનર્જી ભાવની હલચલ અને મિડલ ઈસ્ટની સ્થિતિ બજારની દિશા નક્કી કરશે. નિષ્ણાતોના અનુમાન મુજબ નજીકના સેશન્સમાં અમેરિકન બજાર “ન્યુટ્રલ ટુ પોઝિટિવ” ઝોનમાં રેન્જ બાઉન્ડ રહી શકે છે.
