વર્તમાન કારોબારી સેશનમાં આંતરરાષ્ટ્રીય કમોડિટી બજારમાં ગોલ્ડ અને સિલ્વરમાં નોંધાયેલ ઉછાળાએ રોકાણકારો અને ટ્રેડરોમાં થોડી સ્થિરતા લાવી છે. અમેરિકા–ઈરાન વચ્ચે શાંતિ કરાર તરફ મર્યાદિત પ્રગતિની આશાઓ વચ્ચે બજારમાં વોલેટિલિટી યથાવત રહી છે.
બજારના મુખ્ય પરિબળો :
અમેરિકા અને ઈરાન વચ્ચે છેલ્લા કેટલાંક દિવસોમાં વધેલા તણાવ બાદ, ગત ૨૪ કલાકમાં પોઝિટિવ નિવેદનોને કારણે કમોડિટી બજારમાં સુધારો જોવા મળ્યો છે. ડોનાલ્ડ ટ્રમ્પે ઈરાન પર સંભવિત હુમલો અટકાવ્યાની જાહેરાત અને શાંતિ ચર્ચાઓ આગામી દિવસોમાં આગળ વધશે એવી ટિપ્પણી બાદ કોમેકસ ગોલ્ડમાં તાત્કાલિક ઉછાળો આવ્યો. ગોલ્ડ ફ્યુચર ૧૫૪ ડોલર પ્રતિ ઔંસ વધીને ૪૨૬૭ ડોલર સુધી પહોંચ્યું, જ્યારે સિલ્વરમાં ૪ ડોલરનો ઉછાળો નોંધાયો.
મિડલ ઈસ્ટમાં સ્ટ્રેટ ઓફ હોર્મૂઝ ખોલવાની સંભાવના અને સીઝફાયર લંબાવવાના અહેવાલોએ બજારમાં મર્યાદિત સકારાત્મકતા ઉમેરેલી છે. જોકે, બંને દેશોની તરફથી વિરુદ્ધ પ્રકારના નિવેદનો આવતા સાવચેતીનો માહોલ યથાવત રહ્યો છે.
ટેકનિકલ દૃષ્ટિકોણ :
ટેકનિકલ ચાર્ટ મુજબ ગોલ્ડમાં તાજેતરના ઘટાડા બાદ થયેલો આ ઉછાળો શોર્ટ કવરિંગ રૂપે પણ ગણાઈ શકે છે. ઉપરની તરફ ૪૩૦૦ ડોલર નજીક મજબૂત રેઝિસ્ટન્સ છે, જ્યાંથી ફરી નફારૂપી વેચવાલીની સંભાવના નકારી શકાય નહીં. સિલ્વર માટે ૭૦ ડોલર જંકશન મહત્વનું રેઝિસ્ટન્સ માનવામાં આવે છે.
ભારતીય MCX પર ગોલ્ડ ફ્યુચર ૨૧૨૧ રૂપિયાના ઉછાળા સાથે ૧,૫૧,૦૫૩ સુધી પહોંચ્યું, જ્યારે સિલ્વર ૫૬૪૫ રૂપિયા વધીને ૨,૪૫,૫૦૦ સુધી પહોચ્યું. છતાં સપ્તાહિક ધોવાણ યથાવત છે.
સેક્ટર દૃષ્ટિકોણ :
કમોડિટી સેગમેન્ટમાં ગોલ્ડ અને સિલ્વરમાં પસંદગીયુક્ત ખરીદી નોંધાઈ છે, પરંતુ વ્યાપક રીતે રોકાણકારો હજુ સાવચેતી જાળવી રહ્યા છે. મિડલ ઈસ્ટના જીઓપોલિટિકલ પરિબળો બજારની ચાલ માટે નિર્ણાયક બની રહ્યા છે અને વોલેટિલિટી વધવાની શક્યતા યથાવત છે.
રોકાણ રણનીતિ :
ઉછાળે નફારૂપી વેચવાલી યોગ્ય રહી શકે છે, કારણ કે ઉપરના લેવલ્સ પર રેઝિસ્ટન્સ મજબૂત છે. ઘટાડે તબક્કાવાર ખરીદીની રણનીતિ ટૂંકા ગાળાના ટ્રેડરો અપનાવી શકે છે. સ્ટોપલોસ જાળવીને પોઝિશન લેવામાં સાવચેત રહેવું યોગ્ય રહેશે.
ભાવિ દિશા :
આગામી સેશન્સમાં બજાર રેન્જ બાઉન્ડ ચાલ જાળવી શકે છે, કારણ કે અમેરિકા–ઈરાન ચર્ચાઓમાં સ્પષ્ટતા મળ્યા વગર દિશા મજબૂત બનવાની સંભાવના ઓછી છે. વૈશ્વિક ક્રૂડ મૂવમેન્ટ અને ડોલર ઈન્ડેક્સ પણ કિંમતોની દિશા પર અસર કરશે.
