વર્તમાન કારોબારી સેશનમાં વૈશ્વિક ક્રૂડ ઓઇલ ફ્યુચર્સમાં નોંધપાત્ર ઘટાડો જોવા મળ્યો છે. યુએસ અને ઇરાન વચ્ચે ચાલતી સમજૂતીની ચર્ચાઓ આગળ વધતી હોવાના સંકેતોથી બજારમાં સાવચેતીનો માહોલ યથાવત રહ્યો છે.
સોમવારની શરૂઆતમાં બ્રેન્ટ ઓગસ્ટ ફ્યુચર્સ લગભગ ૫ ટકાથી વધુ ઘટીને ૯૪.૮૮ ડોલર પર પહોંચ્યા હતા, જ્યારે WTI જુલાઈ ફ્યુચર્સમાં પણ ૫.૭૮ ટકાનો ઘટાડો નોંધાયો. ભારતીય MCX પર જૂન ક્રૂડ ઓઇલ ફ્યુચર્સ ૪.૯૦ ટકાના ઘટાડા સાથે ૮૭૧૯ રૂપિયે અને જુલાઈ ફ્યુચર્સ ૪.૫૭ ટકાના ઘટાડા સાથે ૮૪૮૭ રૂપિયે કારોબાર કરી રહ્યા હતા.
યુએસ પ્રમુખ ડોનાલ્ડ ટ્રમ્પ દ્વારા જણાવાયું કે ચર્ચાઓ રચનાત્મક દિશામાં આગળ વધી રહી છે, પરંતુ કોઈ ઝડપમાં નિર્ણય લેવો નહીં. આ નિવેદન બાદ બજારમાં વોલેટિલિટી વધુ જોવા મળી.
બજારના મુખ્ય પરિબળો :
યુએસ–ઇરાન સમજૂતીની આશાએ સ્ટ્રેટ ઓફ હોર્મુઝ ફરીથી ખુલવાની શક્યતા વધી છે, જે વૈશ્વિક સપ્લાયની ચિંતા ઘટાડે છે અને તેલના ભાવમાં દબાણ લાવે છે. તેમ છતાં, ઇરાનની સ્થાનિક મીડિયા મુજબ હજી કેટલાક મહત્વપૂર્ણ મુદ્દાઓ પર મતભેદ યથાવત છે.
એશિયન સેશન દરમિયાન બ્રેન્ટ ફરી ૧૦૦ ડોલરથી નીચે આવ્યું, જે બજારમાં બેરિશ બાયસ વધારતું જણાય છે.
ટેકનિકલ દૃષ્ટિકોણ :
ટેકનિકલ ચાર્ટ મુજબ ક્રૂડ ઓઇલ ફ્યુચર્સમાં બ્રેકડાઉન જોવા મળી રહ્યું છે. ઉપરની બાજુએ રેઝિસ્ટન્સ મજબૂત બન્યું છે જ્યારે નબળી ક્લોઝિંગને કારણે બેરિશ બાયસ યથાવત છે. જો MCX પર જૂન કોન્ટ્રેક્ટ ૮૭૦૦ રૂપિયાથી નીચે સ્થિર રહે તો વધુ ઘટાડાની સંભાવના નકારી શકાય નહીં.
નીચેના સપોર્ટ લેવલ તૂટે તો પસંદગીયુક્ત ધોવાણ વધવાની ધારણા છે.
સેક્ટર દૃષ્ટિકોણ :
તેલના ઘટાડાનો પ્રભાવ એનર્જી અને ઓઇલ–લિંક્ડ સેક્ટરો પર સ્પષ્ટ દેખાઈ રહ્યો છે. પેટ્રોકેમિકલ્સ અને ઓઇલ માર્કેટિંગ કંપનીઓમાં મર્યાદિત ખરીદી જોવા મળી રહી છે, જ્યારે મિડકેપ એનર્જી શેરોમાં પસંદગીયુક્ત ધોવાણ યથાવત છે.
રોકાણ રણનીતિ :
ઉછાળે નફારૂપી વેચવાલી ચાલુ રહે તેવી સંભાવના છે. ઘટાડે તબક્કાવાર ખરીદી યોગ્ય રહેશે, પરંતુ સ્ટોપલોસનું કડક પાલન અનિવાર્ય છે. વોલેટિલિટી ઊંચી રહેવાના કારણે ટૂંકા ગાળાના ટ્રેડર્સે સાવચેતીથી કારોબાર કરવો જરૂરી છે.
ભાવિ દિશા :
આગામી સેશન્સમાં બજાર રેન્જ બાઉન્ડ થી નેગેટિવ વલણમાં રહી શકે છે. સમજૂતી સંબંધિત વૈશ્વિક સમાચાર અને યુએસ–ઇરાન ચર્ચાઓ ક્રૂડ ઓઇલની દિશા નક્કી કરશે. ચર્ચાઓ લાંબા સમય સુધી ચાલવાની સંભાવના હોવાથી વોલેટિલિટી યથાવત રહેવાની ધારણા છે.
