વર્તમાન કારોબારી સેશનમાં વૈશ્વિક માર્કેટમાં વોલેટિલિટી યથાવત રહી છે, અને આ વચ્ચે એલોન મસ્કની સ્પેસએક્સ તરફથી IPO સંબંધિત મોટા અપડેટ્સ સામે આવ્યા છે. કંપની ૨ ટ્રિલિયન ડોલરથી વધુ વેલ્યુએશન સાથે બજારમાં ઉતરવાની તૈયારીમાં છે, જેને વૈશ્વિક સ્તરે અત્યાર સુધીનું સૌથી મોટું IPO ગણાવવામાં આવી શકે છે.
કંપની વિશે :
સ્પેસએક્સ રૉકેટ, સેટેલાઈટ અને કૃત્રિમ બુદ્ધિ આધારિત બિઝનેસ ચલાવતી કંપની છે. કંપનીએ ગુપ્ત રીતે SEC સમક્ષ પોતાના IPO માટેના ડ્રાફ્ટ દસ્તાવેજો ફાઈલ કર્યા છે અને વર્ષના અંત સુધીમાં માર્કેટ ડેબ્યૂની શક્યતા દર્શાવી છે. ફેબ્રુઆરીમાં મસ્કની xAI સાથેના મર્જર બાદ સ્પેસએક્સનું સંયુક્ત વેલ્યુએશન ૧.૨૫ ટ્રિલિયન ડોલર નોંધાયું હતું. હવે જો IPO સફળ થાય તો ૨ ટ્રિલિયન ડોલરનો આંકડો કંપનીને વિશ્વની ટોચની કંપનીઓની યાદીમાં સ્થાન અપાવી શકે છે.
બજારના મુખ્ય પરિબળો :
• રેકોર્ડબ્રેકિંગ વેલ્યુએશનને કારણે વૈશ્વિક રોકાણકારોમાં ઉત્સાહ જોવા મળી રહ્યો છે.
• કંપનીની ભવિષ્ય યોજના મુજબ સ્પેસમાં AI ડેટા સેન્ટર અને ચંદ્ર પર ફેક્ટરી સ્થાપવાનો ઉદ્દેશ છે, જેના કારણે ઊંચા મૂડીરોકાણની જરૂરિયાત ઊભી થશે.
• IPOમાંથી મળનારી રકમનો મોટો ભાગ ટેરાફેબ પ્રોજેક્ટ તથા ચિપ મેન્યુફેક્ચરિંગ ક્ષમતાના વિસ્તરણ માટે વપરાશે.
• બેંક ઑફ અમેરિકા, સિટીગ્રુપ, ગોલ્ડમેન સૅક્સ, જેપીમોર્ગન અને મોર્ગન સ્ટૅનલેય જેવા મોટા ઇન્વેસ્ટમેન્ટ બેંકો IPOનું નેતૃત્વ કરશે, જે વૈશ્વિક ટેક સેગમેન્ટમાં બુલિશ બાયસ જાળવી શકે છે.
ટેકનિકલ દૃષ્ટિકોણ :
ટેકનિકલ ચાર્ટ મુજબ વૈશ્વિક ટેક સેગમેન્ટમાં વોલેટિલિટી યથાવત છે. મોટા IPOની જાહેરાતો બજારમાં પસંદગીયુક્ત ઉછાળો લાવે છે, પરંતુ ઊંચા લેવલ પર પ્રોફિટ બુકિંગ પણ જોવા મળે છે. સ્પેસએક્સ જો ૨ ટ્રిలિયન ડોલર વેલ્યુએશન હાંસલ કરે તો ટેક સેક્ટરમાં મજબૂત બુલિશ બાયસ સર્જાઈ શકે છે.
રોકાણ રણનીતિ :
• IPO સંબંધિત સમાચારને ધ્યાનમાં રાખીને રોકાણકારોએ સાવચેતી રાખવી જરૂરી રહેશે.
• ઉછાળે નફારૂપી વેચવાલી અને ઘટાડે તબક્કાવાર ખરીદીનું વલણ ટેક સેગમેન્ટમાં યથાવત રહી શકે છે.
• લાંબા ગાળાના રોકાણકારો માટે ક્વોલિટી ટેક શેરોમાં મર્યાદિત પોઝિશન બનાવવું અનુકૂળ રહેશે.
ભાવિ દિશા :
આગામી દિવસોમાં સ્પેસએક્સ IPO સંબંધિત નવી વિગતો બહાર આવશે અને તેની અસર વૈશ્વિક ટેક બજારમાં રેન્જ બાઉન્ડ વલણ સાથે દેખાઈ શકે છે. ડ્યુઅલ-ક્લાસ શેર માળખાની ચર્ચા પણ વોલેટિલિટી વધારવાનું કારણ બની શકે છે. જો જૂન મહિનામાં લિસ્ટિંગ થાય તો આ વર્ષનું સૌથી મહત્વપૂર્ણ વૈશ્વિક ઇવેન્ટ બની શકે છે.
