વર્તમાન કારોબારી સેશનમાં વિવિધ કંપનીઓના Q1 ના નાણાકીય પરિણામો જાહેર થતા બજારમાં મિશ્ર વલણ જોવા મળી રહ્યું છે. કંપનીઓના નફા અને વેચાણમાં થયેલા ફેરફારોને કારણે શેરોમાં વોલેટિલિટી યથાવત રહી છે. બીએસઇ સેન્સેક્સ ૭૬,૭૬૫.૯૨ અંક પર ૬૯.૮૬ અંકનો મર્યાદિત ઘટાડો નોંધાયો હતો, જ્યારે નિફ્ટી ૨૩,૯૮૫.૩૫ અંક પર ૧૦.૬૦ અંકના ઘટાડા સાથે બંધ રહ્યો હતો.
નાણાકીય પરિણામો :
કંપનીઓના Q1 ના પરિણામોમાં મોટો તફાવત જોવા મળ્યો છે. ટાટા કેપિટલના નફામાં ૭૬% નો મોટો ઉછાળો જોવા મળ્યો છે, જે રૂપિયા ૯૯૯.૪૪ કરોડ રહ્યો છે. ચોલામંડલમ ઇન્વેસ્ટમેન્ટના નફામાં પણ ૪૫.૫% નો ઉછાળો નોંધાયો છે, જે રૂપિયા ૧૬૫૩.૫૯ કરોડ રહ્યો છે. સિટી યુનિયન બેંકના નફામાં ૨૫% નો વધારો નોંધાતા તે રૂપિયા ૩૮૨.૫૭ કરોડ પર પહોંચ્યો છે. કોફોર્જના નફામાં ૪૯% નો વધારો થતા તેના શેરમાં ૯% થી વધુનો ઉછાળો જોવા મળ્યો છે. નેટવેબ ટેકનોલોજીસનો નફો રૂપિયા ૮૫.૩૨ કરોડ રહ્યો, જે ગત વર્ષના રૂપિયા ૩૦.૫ કરોડની સરખામણીમાં નોંધપાત્ર ઉછાળો દર્શાવે છે. આઇરિસ ક્લોથિંગના નફામાં ૫૩% અને ટીટીકે પ્રેસ્ટિજના નફામાં બમણાથી વધુનો ઉછાળો જોવા મળ્યો છે, જે રૂપિયા ૫૯.૩૩ કરોડ રહ્યો. રેડિકો ખૈતાનનો નફો ૬૯.૫% વધીને રૂપિયા ૨૨૬ કરોડ થયો છે, જ્યારે ફાયઝરનો નફો ૬.૬% વધીને રૂપિયા ૨૦૪.૪૭ કરોડ પર પહોંચ્યો છે.
બીજી તરફ, અમબુજા સિમેન્ટના નફામાં ૩૬.૭% નો ઘટાડો જોવા મળ્યો છે, જે રૂપિયા ૫૦૪ કરોડ રહ્યો છે. હિન્દુસ્તાન યુનિલિવર (HUL) ના નફામાં ૩.૬% નો ઘટાડો નોંધાયો છે, જે રૂપિયા ૨,૬૩૧ કરોડ રહ્યો. સુઝલોન એનર્જીના નફામાં પણ ૧૨% નો ઘટાડો નોંધાયો છે, જે રૂપિયા ૩૦૬.૪૪ કરોડ રહ્યો. સુંદરમ ક્લેટનનું નેટ નુકસાન વધીને રૂપિયા ૫૯ કરોડ થયું છે.
કંપની વિશે :
અમબુજા સિમેન્ટના CEO વિનોદ બાહેટીના જણાવ્યા અનુસાર, નફામાં ઘટાડા છતાં કંપનીએ કાર્યકારી શ્રેષ્ઠતા દ્વારા ખર્ચ ઘટાડવા અને ક્ષમતા વધારવા પર ધ્યાન કેન્દ્રિત કર્યું છે. સુઝલોન એનર્જીના નફામાં ઘટાડો થયો હોવા છતાં, કંપનીની રેવન્યુમાં ૨૩% નો ઉછાળો નોંધાયો છે, જે બજાર માટે સકારાત્મક સંકેત દર્શાવે છે. ટાટા કેપિટલ અને ચોલામંડલમ જેવી NBFCs એ Q1 માં મજબૂત વૃદ્ધિ દર્શાવી છે, જે આ સેક્ટર માટે ઉજ્જવળ ભાવિ સૂચવે છે.
ભાવિ દિશા :
આગામી સેશન્સમાં બજાર Q1 ના ડેટા અને વૈશ્વિક સંકેતો પર નજર રાખશે, જે બજારની ભાવિ દિશા નક્કી કરશે. શેરબજારમાં અત્યારે સાવચેતીનો માહોલ યથાવત છે. રોકાણકારોએ ક્વોલિટી શેરોમાં પોઝિશન બનાવતી વખતે કડક સ્ટોપલોસનું પાલન કરવું અનિવાર્ય છે. ઉછાળે નફારૂપી વેચવાલી અને ઘટાડે તબક્કાવાર ખરીદી – આ બંને પ્રવૃત્તિઓ વચ્ચે બજાર હાલમાં રેન્જ બાઉન્ડ રહી શકે છે.
