સ્પેસએક્સના તાજેતરના રેકોર્ડ સ્તરના આઈપીઓ બાદ વૈશ્વિક બજારમાં ચર્ચા તેજ બની છે. કંપનીએ માત્ર ૫ ટકા હિસ્સો વેચીને આશરે ૭૫ અબજ ડોલર જેટલી મૂડી ઊભી કરી છે. ગ્રીનશૂ ઓપ્શનના કારણે આગામી દિવસોમાં વધારાની મૂડી ઉઠાવવાની શક્યતા યથાવત રહી છે.
કંપનીએ મોર્ગન સ્ટેનલીને વધારાના ૧૫ ટકા શેર આઈપીઓ પ્રાઈસ ૧૩૫ ડોલર પર ૩૦ દિવસ સુધી ખરીદવાનો વિકલ્પ આપ્યો છે. આ ઓપ્શન બજારમાં વોલેટિલિટી નિયંત્રણમાં રાખવા માટે મહત્વનું સાધન માનવામાં આવે છે.
કંપની વિશે :
સ્પેસએક્સનું આઈપીઓ નાસ્ડેક પર મજબૂત પ્રતિસાદ સાથે લિસ્ટ થયું છે. આશરે ૫૫૫.૬ મિલિયન શેરોની વેચવાલી સાથે શરૂઆત થઈ, જ્યારે ગ્રીનશૂ ઓપ્શનનો સંપૂર્ણ ઉપયોગ થાય તો સંખ્યા વધીને આશરે ૬૩૮.૯ મિલિયન સુધી પહોંચી શકે છે. આથી કંપનીને વધારાના આશરે ૧૧.૨ અબજ ડોલરની મૂડી પ્રાપ્ત થવાની શક્યતા છે.
ગ્રીનશૂ ઓપ્શન હેઠળ અન્ડરરાઇટર્સ પહેલા વધારાના શેર માર્કેટમાં વેચી દે છે અને ત્યારબાદ જરૂર પડે ત્યારે કંપની પાસેથી ખરીદીને પોતાની પોઝિશન સંતુલિત કરે છે. આ પ્રક્રિયા શેર પ્રાઈસમાં અતિશય ઉછાળો કે ઘટાડો રોકવામાં સહાયરૂપ બને છે.
બજારના મુખ્ય પરિબળો :
વર્તમાન કારોબારી સેશનમાં વૈશ્વિક બજારોમાં વોલેટિલિટી યથાવત રહી છે, જેના કારણે સ્પેસએક્સના પ્રાઈસ મૂવમેન્ટ પર સાવચેતીનો માહોલ છે. ચીનની અલિબાબાએ ૨૦૧૪ના આઈપીઓ સમયે સંપૂર્ણ ગ્રીનશૂ ઓપ્શનનો ઉપયોગ કર્યો હતો જ્યારે તેના શેરોમાં ઉછાળો જોવા મળ્યો હતો. તેની સામે ૨૦૧૯માં યુબરના આઈપીઓ પછી ઘટાડો નોંધાયો હતો અને અન્ડરરાઇટર્સને બજારમાં મર્યાદિત ખરીદી કરીને દબાણ નિયંત્રિત કરવું પડ્યું હતું.
ટેકનિકલ દૃષ્ટિકોણ :
ટેકનિકલ ચાર્ટ મુજબ સ્પેસએક્સના શેરોમાં શરૂઆતના દિવસોમાં ઊંચી વોલેટિલિટી રહેવાની શક્યતા છે. આઈપીઓ પ્રાઈસ આસપાસ રેઝિસ્ટન્સ અને નીચેની તરફ સપોર્ટ લેવલનું પરીક્ષણ આગામી સપ્તાહમાં મુખ્ય પરિબળ બની શકે છે. ઉછાળે નફારૂપી વેચવાલી અને ઘટાડે તબક્કાવાર ખરીદીનો વલણ સ્વાભાવિક રીતે સામે આવી શકે છે.
ભાવિ દિશા :
આગામી સેશન્સમાં બજાર રેન્જ બાઉન્ડ રહી શકે છે. ગ્રીનશૂ ઓપ્શનના કારણે અન્ડરરાઇટર્સ શેર પ્રાઈસને સ્થિર રાખવાનો પ્રયાસ કરશે, જેથી પ્રથમ મહિને મર્યાદિત વોલેટિલિટી યથાવત રહે. રોકાણકારો માટે આ સમયગાળામાં સાવચેતી અપનાવવી યોગ્ય રહેશે, ખાસ કરીને જ્યારે શેર પ્રાઈસ આઈપીઓ પ્રાઈસથી ઉપર કે નીચે દિશામાં મૂવ કરે છે તે ગંભીર રીતે જોવાનું રહેશે.
