ભારતના વાણિજ્ય અને ઉદ્યોગ મંત્રી પિયુષ ગોયલના નેતૃત્વમાં ભારતીય બિઝનેસ પ્રતિનિધિઓનું ગ્રીસ પ્રવાસ શરૂ થયું છે. આ મુલાકાતનો મુખ્ય ઉદ્દેશ્ય ભારત અને ગ્રીસ વચ્ચે દ્વિપક્ષીય વેપાર, રોકાણ અને સ્ટાર્ટઅપ સહયોગને વધુ મજબૂત બનાવવાનો છે. આ દરમિયાન પ્રતિનિધિઓ એથેન્સ સ્ટાર્ટઅપ બિઝનેસ ઈન્ક્યુબેટર માં સ્ટાર્ટઅપ પિચિંગ અને પ્રેઝન્ટેશનમાં ભાગ લેશે. આ મુલાકાત દરમિયાન ઉચ્ચ સ્તરીય વ્યવસાયિક વાતચીત દ્વારા બંને દેશો વચ્ચેના વ્યાપારી જોડાણો વધારવા પર ધ્યાન કેન્દ્રિત કરવામાં આવશે.
સેક્ટર દૃષ્ટિકોણ :
વાણિજ્ય મંત્રાલયના ડેટા મુજબ, FY૨૦૨૫-૨૬ માં દ્વિપક્ષીય વેપાર ૧.૨૮ બિલિયન ડોલર રહ્યો હતો. ભારત ગ્રીસને એલ્યુમિનિયમ, સ્માર્ટફોન, એન્જિનિયરિંગ ગુડ્સ, ફાર્માસ્યુટિકલ્સ, સીફૂડ અને કોફી જેવી વસ્તુઓની નિકાસ કરે છે. સામે પક્ષે ભારત ગ્રીસમાંથી ક્રૂડ ઓઈલ, પેટ્રોલિયમ ઉત્પાદનો, એલ્યુમિનિયમ સ્ક્રેપ, માર્બલ અને દવાઓ જેવી વસ્તુઓ આયાત કરે છે. ગ્રીસ એ યુરોપ, એશિયા અને આફ્રિકાના સંગમ સ્થાને હોવાથી તેને યુરોપ માટે વ્યૂહાત્મક પ્રવેશદ્વાર માનવામાં આવે છે. ગ્રીસ પાસે વિશ્વની ૨૦% શિપિંગ ક્ષમતા છે અને EU ના ૬૦% થી વધુ મર્ચન્ટ ફ્લીટ પર નિયંત્રણ છે.
કંપની વિશે :
ભારતીય કંપનીઓ ગ્રીસમાં પોતાનું રોકાણ સતત વધારી રહી છે. GMR Airports હાલમાં ગ્રીસના ક્રેટમાં ૮૫૦ મિલિયન યુરોના કાસ્ટેલી ઇન્ટરનેશનલ એરપોર્ટ પ્રોજેક્ટ પર કામ કરી રહી છે. આ ઉપરાંત UPL અને Switz Group જેવી કંપનીઓએ પણ ગ્રીસમાં રોકાણ કર્યું છે. બીજી તરફ, ગ્રીકની કંપનીઓ જેમ કે Alumil, Titan, Eurobank, Pharmaten અને Frigoglass એ ભારતમાં પોતાનું કાર્ય શરૂ કર્યું છે, જે બંને દેશો વચ્ચેના વધતા વ્યાપારિક જોડાણને દર્શાવે છે.
ભાવિ દિશા :
આ પ્રવાસ ભારત અને ગ્રીસ વચ્ચેની વ્યૂહાત્મક ભાગીદારીને વધુ મજબૂત બનાવશે. બંને દેશો શિક્ષણ, સંરક્ષણ, ડિજિટલ પબ્લિક ઇન્ફ્રાસ્ટ્રક્ચર અને લોકો વચ્ચેના સંબંધો પર સહયોગ વધારવા માટે પ્રતિબદ્ધ છે. આ પ્રયાસોથી આગામી દિવસોમાં બંને દેશો વચ્ચેના વ્યાપારી અને રોકાણ ક્ષેત્રના સંબંધોમાં મજબૂત વધારો થવાની શક્યતા છે.
