વૈશ્વિક પડકારો, ટ્રેડ વોરની ભીતિ, જીએસટી દરોમાં ફેરફાર અને અમેરિકાના પ્રમુખ ડોનાલ્ડ ટ્રમ્પ દ્વારા ભારત પર ૫૦% સુધીના ભારે ટેરિફ લાગુ કરવાની જાહેરાત વચ્ચે પણ ભારતીય અર્થતંત્રે અપેક્ષાઓને પાછળ પાડતા નાણાકીય વર્ષ ૨૦૨૫-૨૬ના બીજા ત્રિમાસિકમાં ૮.૨%નો મજબૂત વૃદ્ધિદર નોંધાવ્યો છે. આ આંકડો છેલ્લા ૧૮ મહિનામાં સૌથી વધુ છે અને ભારતે ફરી એકવાર દુનિયાનું સૌથી ઝડપી વિકસતું અર્થતંત્ર હોવાનો દરજ્જો જાળવ્યો છે. આ વૃદ્ધિદરે અર્થશાસ્ત્રીઓના અંદાજોને ખોટા પાડ્યા છે, જેમણે બીજા ત્રિમાસિક માટે ૭ થી ૭.૫% વૃદ્ધિદરોની આગાહી કરી હતી. એપ્રિલ-જૂન ૨૦૨૫માં જીડીપી વૃદ્ધિ ૭.૮% હતી, જ્યારે ગયા વર્ષના સમાન ગાળામાં તે માત્ર ૫.૬% હતી. વર્ષ ૨૦૨૩ના પહેલા ત્રિમાસિકથી અત્યાર સુધી ભારતે કુલ છ વખત ૮%થી વધુનો વૃદ્ધિદર નોંધાવ્યો છે, જે મજબૂત માગ અને આંતરિક અર્થવ્યવસ્થાની શક્તિ દર્શાવે છે.
નેશનલ સ્ટેટિસ્ટિકલ ઓફિસ દ્વારા જાહેર કરાયેલા આંકડા મુજબ, વર્તમાન નાણાકીય વર્ષના પહેલા છ મહિનામાં જીડીપી વૃદ્ધિ ૮% રહી છે, જે ગયા વર્ષના ૬.૧%ની તુલનામાં નોંધપાત્ર તેજી છે. સ્થિર કિંમતો પર જીડીપી બીજા ત્રિમાસિકમાં રૂ.૪૮.૬૩ લાખ કરોડ રહી, જે ગયા વર્ષના રૂ.૪૪.૯૪ લાખ કરોડ કરતાં ઊંચી છે. નામમાત્ર જીડીપીમાં ૮.૭% અને વાસ્તવિક જીડીપીમાં ૮.૧%નો વધારો નોંધાયો છે. આ વૃદ્ધિને ગ્રાહક ખર્ચમાં થયેલા તીવ્ર ઉછાળો, મેન્યુફેક્ચરિંગ સેક્ટરના ૯.૧%ના મજબૂત વિકાસ અને સર્વિસ સેક્ટરના ૯.૨%ના તેજીભર્યા પ્રદર્શનનો મોટો ફાયદો મળ્યો છે. નાણાકીય, રિયલ એસ્ટેટ અને પ્રોફેશનલ સર્વિસિસ સેગમેન્ટમાં પણ ૧૦.૨%ની વૃદ્ધિ જોવા મળી છે, જે શહેરી અર્થતંત્રની મજબૂત સ્થિતિ દર્શાવે છે.
મુખ્ય આર્થિક સલાહકાર વી. અનંત નાગેશ્વરે જણાવ્યું છે કે ચાલુ નાણાકીય વર્ષમાં ભારત ૭%નો વૃદ્ધિદર નોંધાવી શકે છે અને આ ગતિ જળવાઈ રહી તો દેશનું અર્થતંત્ર આ વર્ષે ૪ ટ્રિલિયન ડોલરને પાર કરી જશે. હાલમાં ૩૯૦૦ અબજ ડોલરના જીડીપી સાથે ભારત દુનિયાનું પાંચમું સૌથી મોટું અર્થતંત્ર છે. એનએસઓના આંકડા દર્શાવે છે કે જીએસટી દરમાં ઘટાડો અને ટ્રમ્પના ભારે ટેરિફના નિર્ણયથી સપ્ટેમ્બર ત્રિમાસિકના જીડીપી પર માત્ર નાની અસર થઈ છે, જ્યારે આંતરિક માંગ અને ઉત્પાદન સેગમેન્ટે ભારતના વિકાસને મજબૂત આધાર આપ્યો છે.
