ભારતીય શેરબજાર ગઈકાલે મજબૂત શરૂઆત સાથે નવી ઊંચાઈઓને સ્પર્શી હતી, જ્યાં સેન્સેક્સે ૮૬૦૫૫ પોઈન્ટની અને નિફ્ટી ફ્યુચરે ૨૬૪૯૫ પોઈન્ટના ઓલ-ટાઈમ હાઈ મથાળાને સ્પર્શ્યા હતા. બજારમાં આ તેજીને પાછળ જીડીપી ડેટા, અમેરિકા–ભારત વેપાર કરાર પર ચાલી રહેલી ચર્ચાઓ, આવતા સપ્તાહે મળનારી રિઝર્વ બેન્કની બેઠક અને વિદેશી રોકાણ પ્રવાહ અંગેની અપેક્ષા જેવા પરિબળો જવાબદાર રહ્યા હતા.
સ્તાનિક સ્તરે વ્યાજ દરમાં શક્ય ઘટાડો ઉપભોક્તા માગમાં વૃદ્ધિ લાવશે તેવી ધારણાએ રોકાણકારોને ટેકો આપ્યો હતો, જ્યારે અમેરિકન ફેડ દ્વારા વ્યાજ દર ઘટાડવાની સંભાવનાએ એફઆઈઆઈ પ્રવાહ ફરી તેજ થવાની આશા જગાવી છે. પરંતુ ઊંચા મથાળે પ્રોફિટ-બુકિંગ આવતા ભારતીય શેરબજારમાં ઘટાડો નોંધાયો હતો.નિફ્ટી ફ્યુચર ઈન્ડેક્સ ૨૬૩૧૭.૫૦ પોઈન્ટ સુધી નીચે જઈ જતાં અંતે ૯.૭૦ અંકની વૃદ્ધિ સાથે ૨૬૩૯૦.૯૦ પોઈન્ટ પર બંધ રહ્યો હતો, તો સેન્સેક્સ ૮૫૪૭૩.૮૫ પોઈન્ટ સુધી નીચે જઈ અંતે ૧૧૦.૮૭ પોઈન્ટના વધારા સાથે ૮૫૭૨૦.૩૮ પોઈન્ટ પર બંધ રહ્યો હતો.
બેન્ક અને આઈટી શેરોમાં ખરીદી ટકી રહી હતી, જ્યારે મેટલ, ઓટો અને રિયલ્ટી સેક્ટરમાં નરમાઈ રહી હતી. જીએસટી ઘટાડા બાદ સપ્ટેમ્બર અને ઓક્ટોબરમાં ઓટો વેચાણમાં નોંધાયેલી જોરદાર વૃદ્ધિથી ઓટો શેરોમાં તાજેતરમાં તેજી આવી હતી, પરંતુ અંતે તેમાં પ્રોફિટ-બુકિંગનું વલણ જોવા મળ્યું હતું. રિઝર્વ બેન્કની આવનારી બેઠક પહેલા બેન્કિંગ શેરોમાં મિશ્ર ચાલ રહી છે, જોકે મોંઘવારી ઘટતાં રેપો રેટમાં ઘટાડાની શક્યતાએ પસંદગીના બેન્ક સ્ટોક્સમાં લેવાલીને ટેકો આપ્યો હતો.
અમેરિકામાં વ્યાજ દર ઘટાડવાની શકયતા વધતાં ભારતીય આઈટી શેરોમાં રોકાણકારોનું આકર્ષણ મજબૂત રહ્યું હતું. ક્રુડ ઓઈલના પૂરવઠામાં વધારો થવાથી ભાવ પર દબાણ આવતા ઓઈલ સેક્ટરના સ્ટોક્સ બીએસઈ પર દબાણ હેઠળ જોવા મળ્યા હતા.
