નિફટી ફ્યુચર ૨૫૨૦૨ પોઈન્ટ અતિ મહત્વની સપાટી..!!! – ૧૧ સપ્ટેમ્બર ૨૦૨૫

રોકાણકાર મિત્રો, આનંદ ને…!! તા.૧૦.૦૯.૨૦૨૫ ના રોજ..

બીએસઇ સેન્સેક્સ :- ઇન્ટ્રા ડે ટ્રેડીંગની શરૂઆતે
બીએસઇ સેન્સેક્સ આગલા બંધ ૮૧૧૦૧ સામે
૮૧૫૦૪ પોઈન્ટના મથાળેથી
ખુલીને ૮૧૨૩૫ પોઈન્ટના નીચા મથાળેથી નવી
લેવાલી દ્વારા સેન્સેક્સ આધારિત શેરોમાં તબક્કાવાર ખરીદીનો માહોલ જોવા મળ્યો… સરેરાશ ૪૦૮ પોઈન્ટની
મુવમેન્ટ નોંધાવી ભારતીય શેરબજારનો સેન્સેક્સ ૩૨૩ પોઈન્ટના
ઉછાળા સાથે ૮૧૪૨૫ પોઈન્ટ આસપાસ મજબૂતી
સાથે બંધ થયેલ..!!!

નિફ્ટી ફ્યુચર :- ઇન્ટ્રા
ડે ટ્રેડીંગની શરૂઆતે નિફ્ટી ફ્યુચર આગલા બંધ ૨૪૯૫૦ સામે ૨૫૦૨૧
પોઈન્ટના મથાળેથી ખુલીને ૨૫૦૦૧ પોઈન્ટના નીચા મથાળેથી નવી લેવાલી દ્વારા નિફ્ટી
ફ્યુચર આધારિત શેરોમાં તબક્કાવાર ખરીદીનો માહોલ જોવા મળ્યો… સરેરાશ ૧૨૩ પોઈન્ટની મુવમેન્ટ નોંધાવી નિફ્ટી ફ્યુચર ૧૨૨ પોઈન્ટના ઉછાળા સાથે ૨૫૦૭૨
પોઈન્ટ આસપાસ મજબૂતી સાથે બંધ થયેલ..!!!

સ્થાનિક / વૈશ્વિક પરિબળોની વાત કરીએ તો…
ચોમાસું દેશભરમાં સારૂ રહ્યાની સાથે મોદી સરકાર દ્વારા મેઈક ઈન
ઈન્ડિયાને પ્રોત્સાહન માટે ગત સપ્તાહમાં વિવિધ ઉદ્યોગોને જીએસટીમાં રાહત આપવામાં
આવતાં અને દેશમાં લોકોની ખર્ચપાત્ર આવકમાં વધારો કરવાના પગલાંની પોઝિટીવ અસરે આજે
સપ્તાહના ત્રીજા કારોબારી દિવસે ભારતીય શેરબજાર ઉછાળા સાથે બંધ રહ્યું હતું.

ટ્રમ્પના ટેરિફ યુદ્ધમાં ભારતને ઝુંકાવવા હવે આઈટી સહિતના ઉદ્યોગો પર
આઉટસોર્સિંગ ટેક્ષ લાદવાની અટકળો વચ્ચે ભારત અને અમેરિકા વચ્ચે ટ્રેડ વાટાઘાટ ફરી
શરૂ થવાના અહેવાલ અને ફેડરલ રિઝર્વની આવતા સપ્તાહે મળનારી બેઠકમાં વ્યાજ દરમાં
કપાત આવવાની શક્યતાએ પણ બજારને ટેકો આપ્યો હતો. સાથે જીએસટી મુદ્દે હવે ચિત્ર લગભગ
સ્પષ્ટ થઈ જતા ફંડો, હાઈ નેટવર્થ ઈન્વેસ્ટરો,, મહારથીઓનું શેરોમાં વેલ્યુબાઈંગ
વધતું જોવાયું હતું.

કરન્સી
માર્કેટની વાત કરીએ તો, અમેરિકન ફેડરલ રિઝર્વ દ્વારા વ્યાજ
દરમાં આકર્ષક ઘટાડાની ધારણાં અને અમેરિકન ટ્રેઝરી યીલ્ડમાં ઘટાડા જેવા પરિબળોને
કારણે ડોલરમાં નબળાઈ સામે રુપિયાના મૂલ્યમાં વધારો જોવાયો હતો, જયારે રશિયા પર
અમેરિકાના વધુ સૂચિત પ્રતિબંધો અને ઓપેક તથા સભ્ય દેશો દ્વારા ક્રુડ તેલના
ઉત્પાદનમાં વધારો સાધારણ રહેવાના સંકેતે ક્રુડઓઈલના ભાવમાં સુધારો જોવા મળ્યો હતો.

સેક્ટર
મુવમેન્ટ… બીએસઇ
પર મીડકેપ ઈન્ડેક્સ ૦.૮૪% અને સ્મોલકેપ ઈન્ડેક્સ ૦.૭૨% વધીને બંધ રહ્યા હતા. વિવિધ
સેક્ટરલ ઈન્ડાયસીસની વાત કરીએ તો બીએસઈ પર માત્ર ઓટો, કંઝ્યુમર ડિસ્ક્રેશનરી, કંઝ્યુમર
ડ્યુરેબલ્સ અને ટેલિકોમ્યુનિકેશન સેક્ટરમાં ઘટાડો જોવા મળ્યો હતો, જ્યારે અન્ય બીજા
તમામ સેક્ટરલ ઈન્ડાયસીસ ઉછાળા સાથે બંધ રહ્યા હતા.

બીએસઈમાં
કુલ ટ્રેડીંગ થયેલી ૪૨૮૫ સ્ક્રિપોમાંથી ઘટનારની સંખ્યા ૧૭૧૭ અને વધનારની સંખ્યા ૨૪૧૦
રહી હતી, ૧૫૮ શેરના ભાવમાં કોઈ ફેરબદલ જોવાયો ન હતો. જ્યારે ૬ શેરોમાં ઓનલી સેલરની
મંદીની નીચલી સર્કિટ સામે ૧૦ શેરોમાં ઓનલી બાયરની તેજીની ઉપલી સર્કિટ રહી હતી.

સેન્સેક્સ
સમાવિષ્ટ શેરોમાં મુખ્યત્વે બીઈએલ લિ. ૪.૨૬%, એચસીએલ ટેકનોલોજી ૨.૫૭%, બજાજ
ફાઈનાન્સ ૨.૧૯%, ટીસીએસ લિ. ૧.૯૯%, ટેક મહિન્દ્ર ૧.૮૮%, ઈન્ફોસિસ લિ. ૧.૮૬%, એક્સિસ
બેન્ક ૧.૭૯%, સ્ટેટ બેન્ક ઓફ ઇન્ડિયા ૧.૧૬% અને લાર્સન લિ. ૦.૮૭% વધ્યા હતા, જ્યારે
મહિન્દ્ર એન્ડ મહિન્દ્ર ૨.૪૭%, મારુતિ સુઝુકી ૧.૫૩%, ટાટા મોટર્સ ૦.૯૧%, અલ્ટ્રાટેક
સિમેન્ટ ૦.૬૦%, ઈટર્નલ લિ. ૦.૪૩%, પાવર ગ્રીડ કોર્પોરેશન ૦.૩૩%, ટાઈટન કંપની લિ. ૦.૨૨%,
ટ્રેન્ટ લિ. ૦.૨૦% અને ભરતી એરટેલ ૦.૧૮% ઘટ્યા હતા.

ઈન્ડેક્સ
બેઝડ સેન્સેક્સ, નિફટી ફ્યુચરમાં ઉછાળા સામે મિડકેપ, સ્મોલકેપ શેરોમાં લેવાલીએ
રોકાણકારોની સંપતિ બીએસઈમાં લિસ્ટેડ કંપનીઓનું એક્ત્રિત માર્કેટ કેપિટલાઈઝેશન ૨.૫૯
લાખ કરોડ વધીને ૪૫૬.૪૯ લાખ કરોડ રહ્યું હતું. એસએન્ડપી બીએસઈ સેન્સેક્સની ૩૦
કંપનીઓમાંથી ૧૯ કંપનીઓ વધી અને ૧૧ કંપનીઓ ઘટી હતી.

બજારની ભાવિ દિશા…. મિત્રો,
ભારતીય શેરબજારની ભાવિ દિશા વૈશ્વિક પરિસ્થિતિ અને
સ્થાનિક પરફોર્મન્સ પર આધારિત રહેશે. એમએસસીઆઈ ઉભરતા બજારોના સૂચકાંકમાં ભારતનું
વેઈટેજ બે વર્ષના નીચલા સ્તરે પહોંચવું રોકાણકારો માટે ચેતવણીરૂપ છે. ચીન અને
તાઇવાનની તુલનામાં ભારતીય બજારમાં તાજેતરમાં નબળાઈ જોવા મળી છે, જેના કારણે
વૈશ્વિક ભંડોળોમાંથી પ્રવાહ ઘટવાની સંભાવના છે. નબળી કમાણી, ધીમી આર્થિક વૃદ્ધિ
અને અમેરિકાના ઊંચા ટેરિફ જેવા પરિબળો પણ રોકાણકારોની વિશ્વસનીયતા પર અસર કરી
રહ્યા છે. ટૂંકા ગાળે, બજારમાં વોલેટિલિટી ચાલુ રહેવાની શક્યતા છે અને વૈશ્વિક
ફંડ્સ ભારત કરતાં અન્ય ઉભરતા બજારો તરફ વધારે ઝુકી શકે છે.

લાંબા ગાળે, ભારતની મૂળભૂત આર્થિક
સ્થિતિ અને કંપનીઓની સંખ્યામાં વધારો તેને મજબૂત બનાવશે. એમએસસીઆઈ ઇન્ડેક્સમાં
ભારતીય કંપનીઓની સંખ્યા સતત વધી રહી છે, જે ધીમે ધીમે ભારતનું પ્રતિનિધિત્વ મજબૂત
કરશે. જો ચીનની તેજી સ્થિર થાય અથવા તેની વૃદ્ધિ ધીમી પડે, તો ભારતને ફરી ઊંચું
વેઈટેજ મેળવવાની તક મળશે. સરકારના સુધારાત્મક પગલાં, ઉત્પાદન ક્ષેત્ર અને સર્વિસિસ
સેક્ટરમાં વૃદ્ધિ તથા સ્થાનિક રોકાણકારોના મજબૂત ટેકાથી બજારમાં પુનઃસ્થિરતા આવી
શકે છે. એટલે કે મધ્યમથી લાંબા ગાળે ભારતીય શેરબજારમાં પુનઃ તેજી આવવાની શક્યતા
નકારી શકાય તેવી નથી.

                ડિસ્ક્લેમર /
પોલીસી / શરતો www.nikhilbhatt.in ને આધીન…!!!

The securities quoted are
for illustration only and are not recommendatory. Investment in securities
market are subject to market risks. Read and agree Disclaimer and related all
the documents carefully before investing, mentioned on www.nikhilbhatt.in