ભારતીય ઇક્વિટી બજારમાં છેલ્લા કેટલાક અઠવાડિયાંથી દબાણ યથાવત છે. ભારે FII વેચવાલી, નબળી કમાણી અને AI આધારિત સેગમેન્ટોમાં મર્યાદિત ભાગીદારીને કારણે ભારત વૈશ્વિક માર્કેટ કેપ રેન્કિંગમાં સાતમા ક્રમે સરક્યું છે, જ્યારે દક્ષિણ કોરિયાએ મજબૂત ઉછાળો દર્શાવી આગળ વધ્યું છે.
કોરિયાના માર્કેટ કેપે ૫.૦૧ ટ્રિલિયન ડોલરનો આંકડો પાર કર્યો છે, જ્યારે NSE પર લિસ્ટેડ ભારતીય કંપનીઓનું એકત્રિત માર્કેટ કેપ ૪.૮૫ ટ્રિલિયન ડોલર રહ્યું છે.
બજારના મુખ્ય પરિબળો :
વર્તમાન કારોબારી સેશનમાં વૈશ્વિક વોલેટિલિટી યથાવત રહી છે. કોરિયાના સેમસંગ ઇલેક્ટ્રોનિક્સ અને SK હાઇનિક્સ જેવા ચિપ નિર્માતાઓમાં મજબૂત ઉછાળો જોવા મળ્યો છે, જેને કારણે KOSPI ઇન્ડેક્સમાં ૧૦૭ ટકા ઉછાળો નોંધાયો છે. બીજી તરફ, તાઇવાનમાં પણ AI જોડાયેલા શેરોમાં તેજી યથાવત છે.
ભારતમાં IT સેક્ટરમાં ૧૯ ટકા ઘટાડો અને નબળા કમાણીના આઉટલૂકે બજાર ભાવનાને બેરિશ બાયસ તરફ ધકેલ્યું છે. અત્યાર સુધી ૨૦૨૬માં FII દ્વારા ૨૬.૪ બિલિયન ડોલરની નફારૂપી વેચવાલી થતાં દબાણ વધુ વધ્યું છે.
સેક્ટર દૃષ્ટિકોણ :
IT સેક્ટરમાં પસંદગીયુક્ત ધોવાણ યથાવત છે, જ્યારે બેન્કિંગ અને ફાઈનાન્સિયલ શેરોમાં પણ મર્યાદિત દબાણ જોવા મળે છે. કોરિયા અને તાઇવાનમાં AI અને સેમિકન્ડક્ટર સેગમેન્ટમાં મજબૂત ઉછાળો નોંધાતાં એશિયન સેક્ટોરલ ગતિશીલતા બદલાઈ છે.
ભારતમાં AI જોડાયેલી ઉદ્યોગોમાં સીધી ભાગીદારી ઓછી હોવા છતાં, પાવર, કુલિંગ, ઇન્ફ્રાસ્ટ્રક્ચર અને ડેટા સેન્ટર સેગમેન્ટમાં તબક્કાવાર ખરીદી જોવા મળે છે.
ટેકનિકલ દૃષ્ટિકોણ :
ટેકનિકલ ચાર્ટ મુજબ NIFTY અને BSE સેન્સેક્સ બંનેમાં નીચેના સપોર્ટ લેવલ નજીક ક્લોઝિંગ નબળું રહ્યું છે. રેઝિસ્ટન્સ ઝોન ઉપર મજબૂત બ્રેકઆઉટ ન મળવાથી બેરિશ બાયસ યથાવત છે. પસંદગીયુક્ત શેરોમાં ધોવાણને કારણે રેન્જ બાઉન્ડ મૂવમેન્ટ જોવા મળે છે.
રોકાણ રણનીતિ :
ઉછાળે નફારૂપી વેચવાલી અને ઘટાડે તબક્કાવાર ખરીદીની રણનીતિ જાળવી રાખવી યોગ્ય રહેશે. ટૂંકા ગાળાના રોકાણકારો માટે કડક સ્ટોપલોસ જરૂરી છે. હાઈ-બીટા કેટેગરીમાં સાવચેતીનો માહોલ યથાવત રહેશે.
ભાવિ દિશા :
આગામી દિવસોમાં વૈશ્વિક AI આધારિત થીમ્સ માર્કેટ મૂડને અસર કરતી રહેશે. કોરિયા અને તાઇવાનની મજબૂત રેલી વચ્ચે ભારત માટે બુલિશ બાયસ મર્યાદિત રહી શકે છે. FII મૂડ સુધરે ત્યાં સુધી ભારતીય માર્કેટ રેન્જ બાઉન્ડ વલણ અપનાવી શકે છે.
